COMUNICADO OFICIAL (E case espiritual) DA ASOCIACIÓN NON DAMOS FEITO

Aos de aquí, aos de acolá, aos que mandan e aos que simplemente veñen pasalo ben:

Dicía un sabio que "o que non dá feito, polo menos que o intente con graza". E nesta VI edición das Galimpiadas, vaia se o intentamos. Coas emocións aínda a flor de pel e o corpo pedindo terra, dende a organización queremos poñer un pouco de orde e repartir as grazas que ben merecidas as tedes todas e todos.

Aos auténticos heroes e heroínas (Os 19 equipos): Logramos un récord histórico de participación, que se di pronto. Grazas a cada un dos integrantes por vir dar o callo. Iso si, o premio á "Adaptabilidade Suprema" vai para vós: soportar os cambios de horario polas temperaturas máis propias do deserto do Sáhara que do Baixo Miño, e facelo cun sorriso (ou polo menos sen tirarnos as pedras do río), ten un mérito que non hai medalla que o pague. Se cometemos algún fallo, pedímosvos desculpas; a calor tamén nos derreteu algunha neurona a nós.
O noso exército de salvación (Os Voluntarios): Queremos facer unha mención de honra, cun aplauso dos que fan doer as mans, a tódolos voluntarios e voluntarias que cargastes co evento ás costas durante os dous días de Galimpiadas. Estar ao pé do canón, aguantando o sol, estirando cables, colocando valados e vixiando que todo estivese no seu sitio sen perder o bo humor... iso si que é amor á patria galímpica. Sodes o motor desta máquina!
Ao público soberano: Aos que vos achegastes a Caldelas a vivir a experiencia en primeira liña: grazas por darlle cor e ambiente a esta sexta edición. Sen vós, as Galimpiadas serían só xente correndo e suando sen sentido.
Os reis da troula e o ritmo (DJs e grupos): Unha homenaxe especial para os encargados do fin de festa de cada día: Dj Ekix, No All Kansas, DJ Amarok e The Pileidis. Grazas por amenizar o peche de cada xornada, por non deixar que decaese o ánimo e por poñer a bailar a absolutamente todos os presentes (mesmo aos que xa non daban feito nin coas súas pernas). ¡Que ritmo!
O mago dos botóns (Jorge Pimentel): Non hai boa festa sen un bo son, e aí é onde entra Jorge Pimentel, o noso técnico de son e iluminación. Grazas por ambientar maxistralmente todo o evento e facer que as Galimpiadas escoitásense e vésense de luxo desde calquera rincón.

Nota de Máis Alto Respeito (Aos que mandan): Queremos facer unha reverencia institucional —con tódolos botóns da camisa abrochados— ao Concello de Tui e á Deputación de Pontevedra. Grazas pola súa implicación e por entender que o deporte e a troula son cousas moi serias. Prometemos que o ano que vén seguiremos sendo igual de bos (ou polo menos farémolo parecer).

Á artista do ano (Andrea Costa): Un monumento che hai que facer, Andrea. Grazas por deseñar un cartel con tanto agarimo e por dar exactamente no cravo co que a organización buscaba para a imaxe desta edición. Se o evento saíu bonito, en gran parte é porque xa entraba polos ollos grazas a ti.
Aos altofalantes do mundo (Medios e Personaxes Públicos): Grazas en xeral aos medios de comunicação por facerse eco das nosas fazañas, e moi en especial á Radio Municipal de Tui, que foi o noso altofalante oficial para que en todo o mundo (ou polo menos en todo o Baixo Miño) soubesen que estabamos a argallar. Tampouco nos esquecemos dos personaxes públicos que compartiron e falaron de nós; grazas por darnos ese empuxón e facer que as Galimpiadas fosen aínda máis virais.
Aos donos do paraíso: Unha gratitude inmensa á Comunidade de Montes de Caldelas de Tui por permitirnos, un ano máis, montar o noso "circo" nese paraxe de ilusión que é a Ribeira de Caldelas. Grazas tamén aos veciños da Asociación A Ínsua (polos seus brazos e o seu apoio directo á comisión) e ao Balneario de Caldelas por estar sempre aí.
Ao Chiringo Choróns e ao Bar A Capela: Un altar vos imos poñer. Deixar que usemos as vosas instalacións para as probas, aínda que vos supuxese un auténtico crebe de cabeza e cambiar os vosos horarios habituais, é para nota. Pagámosvos en aplausos, que a inflación está difícil, pero as grazas van de coração.
Aos que nos dan de comer, de beber e nos fan a vida máis fácil (Os nosos amados colaboradores): Sen vós, directamente, as forzas non darían nin para o quecemento. Grazas infinitas por poñer o voso gran de area (e os vosos produtos) a:
- Bar Pancho, Tapería El Albergue, Supermercado Carrera, Bar Soeiras, Disgobe-Mahou, Restaurante Nito, Restaurante La de Manu, Abadía de San Roque, YUTMOVIL, Bodegas Chan de Vide e Hipermercado GADIS.